手機支付嘅電子錢包市場競爭愈來愈激烈，繼蘋果公布Apple Pay將於暑假登陸香港後，已經進軍本港電子錢包市場一排嘅TNG，就更加嚴陣以待，噚日TNG行政總裁江慶恩公布推出電子錢包2.0版，聽完之後，Ray最有興趣嘅係「Bus Pass」功能。
「Bus Pass」顧名思義就更係搭車俾錢，江慶恩話已經同部分巴士及小巴營運商簽約，喺車廂內安裝藍牙裝置，用戶只要啟動TNG手機app，當架車埋站，程式就會自動顯示車費，用戶只要撳一下「付款」，就會彈出QR Code俾錢。
至於其他服務包括「現金提款熱點」、「銀行轉帳」同「信用卡增值」，江慶恩話轉帳服務已經同全港20間持牌銀行合作，免收手續費，俾用戶自由將錢轉去已登記戶口，而提款就與兩家找換店合作，首推全球獨家喺佢哋合共27間分店提款，每日上限5萬元。
不過留意番，TNG設有3種會員制度，分別為基本、尊貴及至尊，以上進階版的新服務，尊貴或以上嘅會員才可享用，現金提款更係至尊會員獨享㖭！
